Министерот за здравство, Сашо Клековски, соопшти дека Агенцијата за храна и ветеринарство (АХВ) ја потврди првата мртва птица заразена со западнонилска треска во Скопје. Покрај ова, регистрирани се и првите хумани случаи на инфекцијата во општините Центар и Чаир.
Вкупниот број на заболени лица достигна 43.
„Во моментов имаме 43 случаи на западнонилска треска, од кои 40 се целосно потврдени, а кај три случаи потврдата е направена со еден тест. Она што е ново во однос на претходната состојба се првите регистрирани случаи во Центар и Чаир. Со започнувањето на контролата на птиците, лоциравме и прва мртва птица позитивна на вирусот — станува збор за гавран пронајден во Скопје“, истакна Клековски.
Министерот упати благодарност до граѓаните за нивната активна соработка и за големиот број дојави за пронајдени угинати птици.
„Екипите на АХВ ги собираат мртвите птици од терен, што директно ни помага во попрецизното лоцирање на ризичните подрачја и навременото управување со ризикот од западнонилска треска“, додаде Клековски.