Бугарските медиуми деновиве опширно известуваат за Ива Михаилова, која избега во Бугарија , а нејзиниот случај предизвика реакции и отвори прашања во јавноста во двете земји.
„Ива Михаилова пристигна во Бугарија: Ги изненади институциите во двете земји“ – bTV Новините
„Ива Михаилова: Здравствената состојба ми се влоши, во Бугарија се чувствувам безбедно“
„Ива Михаилова пристигна во Софија на лекување“ – Радио Бугарија
„Ива Михаилова во ‘Пирогов’: Легално ја поминавме границата со мојот адвокат од Северна Македонија“ – Дарик
Ива Михаилова во Бугарија: „Тука се чувствувам безбедно“ – што изјави по пристигнувањето? – Вести.бг
Случајот со 23-годишната Ива Михаилова од Кочани, која по повеќемесечни барања за лекување во Бугарија пристигна во Софија, предизвика нови реакции и дополнително ги заостри односите меѓу Скопје и Софија. Додека таа тврди дека легално ја минала границата со својот адвокат и дека во Бугарија се чувствува безбедно, македонските институции укажуваат дека против неа е во тек судска постапка и дека сè уште важеле мерки за ограничување на нејзиното движење.
Сè започна со тешката сообраќајна несреќа што се случи на 7 октомври 2025 година на патот Кочани – Штип. Во несреќата загина едно лице, а повеќе луѓе беа повредени, меѓу кои и Михаилова, која се здоби со сериозни повреди на ‘рбетот.
Против неа беше покрената судска постапка за сообраќајната несреќа со смртни последици. Михаилова, која има македонско и бугарско државјанство, ја оспорува верзијата на обвинението за причините за несреќата. Таа тврди дека другото возило навлегло во нејзината сообраќајна лента, додека одбраната се повикува и на независни вештачења со кои ги оспорува заклучоците на обвинителството.
По несреќата, на Михаилова ѝ биле одземени македонскиот и бугарскиот пасош, а ѝ била изречена и мерка со која не смеела да го напушта Кочани. Според информациите објавени од македонските институции, мерките биле поврзани со судската постапка и опасноста од бегство.
Во меѓувреме, Михаилова и нејзината одбрана повеќепати барале да ѝ биде овозможено лекување во Бугарија, посочувајќи дека нејзината здравствена состојба се влошува и дека ѝ е потребен специјализиран медицински третман.