Сообраќајот на државните патишта се одвива непречено, по делумно влажни коловози. Намалена видливост поради магла од 20 до 30 метри е забележана на патниот правец од селото Лисец кон Попова Шапка, информира АМСМ.
Интензитетот на сообраќајот на патиштата надвор од градските средини е умерен. На граничните премини, од македонска страна, засега нема подолги задржувања за влез и излез од државата.
Од АМСМ апелираат возачите да се движат со прилагодена брзина, да ја почитуваат сообраќајната сигнализација и внимателно да управуваат со возилата, особено на патиштата што минуваат низ котлини, речни долини и клисури, каде постои можност за појава на одрони. Ова особено се однесува на делниците Катланово – Велес, Маврово – Дебар – Струга, Виница – Берово и Кочани – Делчево.
Во сила останува законската обврска за задолжително поседување зимска опрема во возилата.