СДС и ДУИ оставија зад себе правосуден систем во кој граѓаните не гледаат еднаквост пред законот, туку двојни стандарди, обвинува ВМРО-ДПМНЕ.
Од партијата велат дека постојат случаи во кои, според нив, за полесни прекршоци се изрекуваат високи затворски казни, додека за случаи поврзани со сериозни кривични дела и смртни последици, како што се случаите „Ласкарци“ и пожарот во модуларната болница во Тетово, одговорноста изостанува.
„За кубење коса се суди четири години затвор, а за кражба на 150 ќебапи три години“, наведуваат од ВМРО-ДПМНЕ, оценувајќи дека ваквите случаи ја нарушуваат довербата на граѓаните во правосудството.
Од партијата ги посочуваат и случајот со автобуската несреќа кај Ласкарци, во која загинаа 16 лица, пожарот во модуларната болница во Тетово, во кој животот го загубија 14 лица, како и случајот „Мазут“, за кој тврдат дека е тежок 167 милиони евра. Според ВМРО-ДПМНЕ, граѓаните со години чекаат на целосно расчистување на овие случаи.
„Кога треба да се испита одговорноста на моќни поединци и интереси поврзани со СДС и ДУИ, постапките се одолговлекуваат, а одговорноста изостанува“, се наведува во соопштението.
Од ВМРО-ДПМНЕ порачуваат дека правосудството не смее да биде под партиско влијание и дека законот мора еднакво да важи за сите граѓани.
„Правдата не смее да има партиска книшка, а законот мора да важи еднакво за сите и правдата да биде достапна за сите граѓани“, додаваат од партијата.