Во Општина Могила се реализираат низа проекти во инфраструктурата, образованието, спортот, социјалната заштита и поддршката на семејствата, наведува ВМРО-ДПМНЕ во соопштението.
„По три децении од формирањето на Општина Могила, во завршна фаза е изградбата на првата детска градинка со капацитет за 40 деца и, дополнително, аплицирано е за адаптација на просториите во мултифункционалните објекти во Добрушево и Ивањевци за потребите на детските градинки.
Во патната инфраструктура се реализирани повеќе проекти низ населените места. Асфалтирани се улиците „АСНОМ“ и „Гоце Делчев“, со реконструиран коловоз, атмосферска канализација и тротоари, завршено е асфалтирањето на последниот дел од патниот правец Долно Српци – Беранци, во тек е реконструкцијата на улицата „Пелагонија“, а предвидено е асфалтирање и на дополнителни улици.
Значајни средства се вложуваат и во решавање на проблемите со канализацијата и водоснабдувањето, за што потпишан е договор за доизградба на канализациската мрежа во Добрушево, додека за комплетирање на канализациската мрежа во Ивањевци се обезбедија околу 30 милиони денари, а во тек е изградба на нов водоводен систем, со кој ќе бидат опфатени речиси половина од населените места во општината.
Особено значајна е инвестицијата од 25 милиони денари во енергетска ефикасност на јавните објекти, при што се опфатени спортската сала „Иљо Лопатички“ во Могила и основните училишта „Браќа Миладиновци“ во Добрушево и „Кочо Рацин“ во Ивањевци. Проектот предвидува енергетски ефикасни фасади, топлинска изолација, нова ПВЦ-столарија, подобрување на системите за греење, модернизација на осветлувањето и поставување фотонапонски панели.
Поддршката за семејствата е проширена со повеќе мерки, така што финансиската поддршка за првачињата е зголемена на 9.000 денари, а секое прваче добива и ранец со училиштен прибор, за новороденчињата се обезбедуваат 10.000 денари за прво, 15.000 денари за второ и 30.000 денари за трето дете, додека нова мерка е поддршката од 20.000 денари за новосклучени бракови.
Во социјалната сфера, 20 обучени и лиценцирани негуватели обезбедуваат помош и нега за стари и изнемоштени лица во нивните домови, а обезбедена и опремена е просторија за пензионерите во мултифункционалниот објект во Добрушево.
Инвестиции има и во спортот и младите – изграден е нов фудбалски терен со вештачка трева во рамките на проектот „FIFA Arena“, во соработка со Фудбалската федерација на Македонија, обезбедена е поддршка за спортските клубови, како и средства за доопремување на спортскиот комплекс „Димче Могилчето“.
Во 12 населени места се реализираат реконструкција и изградба на детски катчиња, а преку Младинскиот центар се организираат активности и настани за младите, а паралелно се работи и на локалниот економски развој, така што во зоната Петилеп започнаа првите инвестиции, а реализирани се и обуки за ИТ-вештини и претприемништво за рурални жени.
За подобрување на комуналните услуги, во соработка со Владата се обезбедени три нови камиони, од кои два веќе се пристигнати, како и нови канти и контејнери, додека во делот на заштитата на животната средина реализирани се повеќе еколошки акции и засадени се над 200 нови садници.
Реализацијата на проектите со цел подобрување на условите за животот на граѓаните продолжува и во следниот период, со фокус на инфраструктурата, образованието, семејствата, младите и спортот во сите населени места“, велат од ВМРО-ДПМНЕ.