Христијан Мицкоски, претседател на Владата во интервју во емисијата „Директно“ на ТВ Телма вели дека реконструкцијата која што ја прави како мандатар на Владата на половина од мандатот, всушност значи нова енергија, посочувајќи дека денеска предлозите ќе ги образложи пред членовите на Извршниот комитет на партијата, а потоа истите ќе ги достави до Собранието и пратениците.
„Јас веќе го коментирав принципот на оваа реконструкција, не секогаш треба да менуваме затоа што имаме помала испорака од очекуваната, но исто така секогаш можеме да бидеме подобри од тоа што сме. Тука немам никаква дилема. Понекогаш имаме и промена на приоритетите во рамките на самата коалициона влада и мислам дека оваа реконструкција е комбинација од сите овие столбови за кои што зборувам. Пред членовите на ИК ќе го образложам предлогот со кој што би излегол во парламент бидејќи таква е процедурата и праксата, како мандатар најпрво да се добие поддршка од страна на ИК на партијата за предлогот а потоа да излезам пред парламент и пратениците да го браниме. Така што од прилика тоа кое што ќе следи“, посочи Мицкоски.
На прашањето кои ресори ќе ги добие ВМРО-ДПМНЕ, а кои ќе ги задржи, Мицкоски рече дека добиваат две министерства и тоа здравство и социјална политика, демографија и млади.
„ВМРО-ДПМНЕ во оваа реконструкција ќе добие два ресори кои што до сега беа кај коалиционите партнери тоа ќе бидат, ресорот здравство, и ресорот социјална политика, демографија и млади. Коалициониот партнер ВРЕДИ ќе ги добие ресорите култура, министерството за односи со заедниците и ресорот правда. Министерството за земјоделство ќе оди во рацете на ЗНАМ, тие ќе добијат уште еден дополнителен заменик-министер откако ќе дојдат замениците на дневен ред, а тоа веќе на есен од септември“, одговори Мицкоски.