По случувањата со затруената вода во Гостивар, на граѓаните не им требаат нови политички препукувања, туку сигурност дека водата што ја користат е безбедна, порача Славјанка Петровска.
Таа преку соопштение изнесе две конкретни одлуки кои, според неа, Владата мора веднаш да ги донесе за решавање на кризата.
Првиот чекор, според Петровска, е одземање на надлежностите за водоснабдувањето од локалните власти:
„Прво, Владата веднаш и привремено да го преземе управувањето со водоснабдувањето од локалната самоуправа, сè додека не се утврди целосната состојба и не се гарантира безбедноста на системот. Кога локалните институции не можат да обезбедат безбедна вода, државата нема право да стои настрана и да ја префрла одговорноста.“
Како второ барање, таа ја нагласува потребата од итна теренска акција и чистење на мрежата:
„Второ, итно да започне стручно чистење, испирање и дезинфекција на целата водоводна инфраструктура, проследено со независни и континуирани анализи. До потврдувањето дека водата е целосно безбедна, секој дом мора да добие чиста вода за пиење.“
Петровска порача дека на граѓаните не им се потребни нови комисии и соопштенија дека состојбата се следи, туку конкретна акција.
„Водата не е локално или партиско прашање. Таа е основно човеково право. Одговорна власт дава решенија, а не изговори“, заклучува таа.