Пратеничката група на СДСМ поднесе Предлог-закон за измена и дополнување на Законот за Владата по скратена постапка, со кој се предвидува членовите на Владата да имаат исклучиво македонско државјанство.
Координаторот на пратеничката група на СДСМ, Оливер Спасовски, посочи дека предложеното законско решение е во согласност со иницијативите што претходно беа отворени во Собранието во однос на измените на Законот за пратеници.
Тој појасни дека целта е да се воспостават еднакви критериуми за сите избрани и именувани функционери.
„Со оглед на тоа што таков услов се поставува и во Законот за пратеници, односно пратениците во македонското Собрание можат да бидат исклучиво државјани на Република Северна Македонија, тогаш, сходно на тоа, треба да имаме едно вакво законско решение со кое практично ќе ограничиме исклучиво и единствено само државјани на Република Северна Македонија да можат да бидат избрани за членови на Владата“, истакна Спасовски.
Спасовски нагласи дека граѓаните очекуваат највисоките државни функции да ги извршуваат лица кои имаат единствено македонско државјанство.
„Мислам дека на овој начин ќе ги исполниме очекувањата и на граѓаните, бидејќи гледате дека има добар дел граѓани кои сметаат дека носењето на вакво законско решение би било исправно во овој момент, членовите на Владата, оние што се обврзуваат дека ќе им служат на граѓаните, да бидат исклучиво државјани на државата на која ѝ служат“, рече Спасовски.
Тој додаде дека очекува поддршка од парламентарното мнозинство, потсетувајќи дека власта претходно најавувала брзо донесување на измените на Законот за пратеници, но дека процесот во меѓувреме е успорен.
„Законот за пратеници, еве гледаме сега дека од најголемите најави дека брзо ќе се донесе во Собранието, некако застана тој процес, се успори“, рече Спасовски.
Спасовски потсети дека во јавноста веќе се отворени прашања за поседување странски државјанства од страна на членови на Владата.
„Сега гледаме бугарски државјанства, чешки државјанства итн. Тоа е нешто што го имаме официјално за членовите на Владата и што тие овде, пред Собранието, го имаат потврдено. Зборувам конкретно за министерката за енергетика, Сања Божиновска, а веројатно ќе се уредат овие начини и ќе видиме точно за секој што ќе се избира како член на Владата да важат истите овие правила“, посочи Спасовски.