Пратеничката група на СДСМ, на денешната собраниска седница, поднесе два предлог закона од областа на образованието, Предлог на закон за изменување и дополнување на законот за основното образование и Предлог на закон за изменување и дополнување на законот за средното образование. И двата предлога се однесуваат на финансиска поддршка за учениците, учесници на меѓународни натпревари и нивните ментори и тоа преку покривање на трошоците за котизација, патување, сместување и трошоци за храна. Пратеничката од СДСМ, Даниела Николова, во образложението на предлозите, побара законите да бидат донесени по скратена постапка, и истакна дека и двата предлог закони се важни за учениците од основните и средните училишта, бидејќи нивните успеси го афирмираат образовниот систем, го подигаат угледот на државата и претставуваат силна мотивација за другите ученици да се насочат кон науката и истражувањето.
„Ако не инвестираме во нив денес, утре ќе ги гледаме како успеваат во други држави. Ако очекуваме младите да останат тука и да веруваат во државата, тогаш државата мора прво да покаже дека им верува ним“, рече Николова.
Во образложението за Предлог законот за изменување и дополнување на законот за основното образование, Николова посочи дека со финансиската поддршка ќе се овозможи еднаков пристап на сите талентирани ученици без оглед на нивната финансиска состојба и без оглед во која област се натпреваруваат.
„Законот има за цел да ги поттикне учениците кон поголеми успеси и достојно претставување на Република Северна Македонија на меѓународно ниво. Потребата од ова законско решение произлегува од фактот што голем број на талентирани ученици и покрај постигнатите успеси со кои што навистина се гордееме, се соочуваат со финансиски пречки за учество на вакви натпревари, што може да доведе и до нивно откажување или ограничена можност за претставување на државата на меѓународно ниво. Со обезбедување институционална поддршка за овие трошоци ќе се создадат еднакви можности за сите учесници. Ќе се поттикне развојот на талентите и ќе се даде дополнителен стимул за учениците да продолжат со постигнувања на врвни резултати во науката и образованието. На тој начин ќе покажеме дека државата стои позади најдобрите ученици“, рече Николова.
Во однос на Предлог законот за изменување и дополнување на законот за средното образование кој исто така се однесува на поддршка на учениците за учество на меѓународни натпревари, Николова посочи дека најголем дел од товарот паѓа врз родителите и наставниците и тоа често достигнува суми што многу семејства не можат да ги поднесат.
„Предлогот не е неограничено финансирање, туку системска поддршка за ученици кои официјално се пласирале преку државни натпревари, учествуваат на признати меѓународни олимпијади и натпревари и нивните ментори кои што се официјален дел од тимот. Поддршката на овие ученици е од особено значење за државата бидејќи тие претставуваат вистински амбасадори на македонската наука, знаење и талент на меѓународно ниво. Средношколците се во период кога се формираат нивните професионални интереси. Учеството на меѓународните натпревари често им отвара пат до престижни универзитети, стипендии и научни центри“, рече Николова.
Николова ги повика пратениците да ги поддржат двата предлог закона, но владејачкото мнозинство предводено од ВМРО, не даде поддршка за финансиска помош на учениците од основните и средните училишта кои учествуваат на меѓународни натпревари.