Close Menu

    (ВИДЕО) Букурешт погоден од најсилната бура во последните 40 години – едно лице загина

    2 Mins Read
    ФОТО: Принтскрин

    Романската престолнина синоќа беше погодена од силно невреме проследено со црвена временска тревога, за кое метеоролозите проценуваат дека е меѓу најразорните во изминатите четири децении. Според официјалните извештаи, едно лице го загуби животот во округот Илфов кога дрво паднало врз неговиот автомобил, а причинета е и огромна материјална штета.

    Врнежите кои траеле околу 12 часа достигнале количества кои вообичаено паѓаат за месец и половина. На станицата Банеаса се измерени 88 литри дожд на квадратен метар, додека во Филарет 73, а во Афумаци 70 литри.

    Поројниот дожд предизвика колапс во сообраќајот, претворајќи ги главните булевари и клучните сообраќајници во реки, при што во некои делови водата ја надминала висината до колена. Службата за итни случаи Букурешт-Илфов регистрирала стотици пријави за паднати дрвја, столбови и делови од покривни конструкции низ целиот град.

    Граѓаните кои претрпеа штети во станбените зони посочуваат на долгогодишни проблеми со одржувањето на јавното зеленило.

    „По бурата, излеговме надвор и соседите ни кажаа дека врз мојот автомобил паднало дрво. Кога имате дрво толку големо, старо 30 години, сите очекуваат да се случи нешто вакво.“

    „И претходно имавме бури, но тука проблемот е со гранките и нивното кастрење. Тоа е катастрофа!“

    Покрај патната мрежа, сериозни прекини беа забележани и во железничкиот и воздушниот сообраќај. Неколку возови доцнеа повеќе од три часа поради паднати дрвја на пругите, метро станицата кај Централната железничка станица беше целосно поплавена, а дел од летовите беа пренасочени кон други аеродроми.

    До утринските часови, итните служби спровеле вкупно 1.408 интервенции во Букурешт и дополнителни 251 во округот Илфов. Според крајниот биланс, оштетени се вкупно 459 автомобили и 69 градежни објекти, а во текот на деноноќието на бројот 112 биле примени 3.259 повици за помош.