Неверојатна сообраќајна несреќа се случила во истанбулската населба Каѓитхане, каде еден маж завршил во болница откако бил прегазен од сопственото возило. Инцидентот, кој очевидците го опишуваат како филмска сцена, бил целосно снимен од безбедносните камери во околината.
Според информациите, возачот С.Д. се обидувал да излезе од својот двор возејќи наназад, но во еден момент испаднал низ отворената возачка врата. Додека несреќниот човек се обидувал да стане од асфалтот, возилото кое останало без контрола продолжило да се движи и го приклештило меѓу каросеријата и еден ѕид.
Во несреќата мажот се здобил со скршеница на колкот и сериозни повреди на стапалата, но лекарите потврдуваат дека неговиот живот не е во опасност. Покрај повредите, возилото направило вистински хаос на патот, удирајќи во друг автомобил во движење и во електрична табла.