Силно невреме со пороен дожд, град, громови и силен ветер ја зафати Словенија. Од Словенечката агенција за животна средина (АРСО) соопштија дека невремето, кое започнало на северот од земјата, се движело кон централниот дел и југоистокот.
Според извештаите, невремето предизвикало материјални штети, при што силниот ветер откорнувал покриви и соборувал дрвја. Дополнителни оштетувања се регистрирани и од град со големина на орев.
Словенечката управа за заштита и спасување информира дека најтешко погодено е подрачјето на Марибор и околината, каде што има скршени дрвја и гранки, како и оштетени објекти. Штети се пријавени и на зградата на Универзитетскиот медицински центар Марибор.
Инаку, УХМР најави дека времето во Македонија денеска ќе биде променливо облачно со сончеви периоди. Попладне на повеќе места ќе биде нестабилно со пороен дожд, грмежи и засилен ветер. Локално процесите ќе бидат поинтензивни, со можност за невреме, пообилен пороен дожд, силен ветер над 60 километри на час и изолирана појава на град. Минималната температура ќе биде од 9 до 18 степени, а максималната од 23 до 32 степени.