Трката за развој на вештачката интелигенција сè повеќе станува и трка за електрична енергија. Огромните центри за податоци во кои се развиваат и користат АИ-системите трошат сè повеќе струја, а токму достапноста на енергија станува еден од клучните услови за нови технолошки инвестиции.
Според податоците на Меѓународната агенција за енергетика, центрите за податоци во 2024 година потрошиле околу 415 терават-часови електрична енергија. До 2030 година потрошувачката би можела повеќе од двојно да се зголеми и да достигне околу 945 терават-часови, а еден од главните двигатели на растот е токму вештачката интелигенција.
Типичен центар за податоци наменет за АИ може да троши струја колку околу 100 илјади домаќинства. Затоа, при изборот на локации, инвеститорите сè повеќе ги анализираат капацитетот и стабилноста на електроенергетската мрежа, цената на струјата и времето потребно за приклучување на објектите.
Ова создава и нова поделба меѓу државите. Според Светска банка, земјите со висок доход располагаат со 77 проценти од глобалниот капацитет на комерцијалните центри за податоци, додека најсиромашните економии имаат помалку од 0,1 процент.
Проблемот е што технологијата се развива многу побрзо од енергетската инфраструктура. Центар за податоци може да се изгради за неколку години, додека нови далекуводи, трафостаници и производствени капацитети бараат значително повеќе време.
Затоа, покрај чиповите, серверите и стручниот кадар, во иднина една од клучните предности во АИ-индустријата ќе биде и можноста државите брзо и сигурно да обезбедат доволно електрична енергија.