Владата предводена од ВМРО-ДПМНЕ уште од првиот ден ги постави модернизацијата и дигитализацијата како клучни столбови на својата работа. Избравме конкретни реформи кои носат резултати и директно го подобруваат квалитетот на животот на граѓаните. Една од тие реформи е системот „Безбеден град“, проект кој е целосно усогласен со европските стандарди и со приоритетите на ЕУ за подобро управување и поголема безбедност на патиштата, се вели во соопштението на ВМРО-ДПМНЕ од денешната прес конференција на Александар Велјановски, пратеник на ВМРО-ДПМНЕ.
Текстот ви го пренесуваме интегрално:
За негова успешна реализација беа донесени сите неопходни законски измени, а целиот процес се водеше транспарентно. Владата уште од самиот почеток ја информираше јавноста дека системот најнапред ќе функционира во пробен период, кој започна на 1 декември минатата година.
Првите резултати од тестирањето јасно покажаа со каква состојба се соочувавме. Само во првите 24 часа беа регистрирани околу 110.000 прекршоци, од кои над 90% се однесуваа на брзо возење, а беа евидентирани околу 5.000 поминувања на црвено светло и околу 1.000 нерегистрирани возила. Овие бројки се силен показател дека ваков систем беше неопходен.
Но, уште во вториот ден од пробниот период беше видлива промената. Бројот на прекршоците се намали за речиси половина, на 50.652 дневно, што покажа дека системот има силен превентивен ефект и влијае врз однесувањето на учесниците во сообраќајот.
До моментот кога започна целата примена на системот, на 1 февруари 2026 година, дневниот број на прекршоци се стабилизираше на околу 500 до 600, што претставува намалување од над 99% во споредба со првиот ден од пробната фаза.
Главната цел на „Безбеден град“ е да се спасуваат човечки животи, да се намали бројот на тешки сообраќајни незгоди и до 2030 година да се преполоват смртните случаи и сериозните повреди на патиштата.
Системот првично беше воведен во Скопје, Тетово, Куманово и на коридорите 8 и 10, а потоа се имплементираше и во Велес.
Минатата недела беа поставени камери на автопатот кај Ново Село во општина Дебарца, додека паралелно започна и неговото постепено воведување во Охрид.
Најважно од се е што денес зборуваме за резултати, а не за ветувања. Во првите пет месеци од примената на системот бројот на загинати лица во сообраќајни незгоди е намален за 40%, од 55 загинати во истиот период минатата година, на 33 оваа година.
Почитувани,
Владата предводена од ВМРО-ДПМНЕ останува цврсто посветена на заштитата на безбедноста на граѓаните и на спроведување политики кои даваат конкретни резултати.
Денес веќе зборуваме за мерливи резултати. Намалувањето на бројот на прекршоци и на жртвите во сообраќајни незгоди покажува дека реформата ја исполнува основната цел, спасување човечки животи и создавање побезбедни патишта за сите граѓани.
Владата ќе продолжи со проширување на системот Безбеден град и со инвестиции во современи технологии кои ја унапредуваат јавната безбедност, затоа што безбедноста на граѓаните нема алтернатива. Нашата обврска е да градиме држава во која законите важат подеднакво за сите, а секој граѓанин ќе се чувствува посигурно и побезбедно.