Инвестициониот циклус во земјава продолжува со реализација на нови странски инвестиции во Тетово, Скопје и Кичево, кои треба да донесат ново производство и нови работни места, изјави на денешната прес-конференција пратеникот од ВМРО-ДПМНЕ, Александар Велјановски.
Како што посочи Велјановски, во ТИРЗ Тетово започнува инвестицијата на мултинационалната компанија „Џаво Отомотив“, која во периодот од 2026 до 2030 година планира да вложи меѓу 20 и 21 милион евра, со план за отворање од 400 до 500 нови работни места и годишен извоз од околу 45 милиони евра.
Во ТИРЗ Скопје 1 веќе започна изградбата на фабриката на „Чагатај Кабло“, инвестиција вредна околу 6 милиони евра која ќе опфати објект од 10.000 квадратни метри и до 200 работни места, додека во ТИРЗ Кичево белгиската „Avesta Battery and Energy Engineering“ гради фабрика за електронски батерии.
„Целта е да привлечеме инвестиции кои носат ново производство, современи технологии, добро платени работни места и поголем извоз, а истовремено да ја диверзифицираме економијата и да не зависиме само од една индустрија“, истакна Велјановски.
Тој додаде дека германската „BMZ Group“ реализира инвестиција од 65 милиони евра за литиум-јонски батерии со 700 планирани вработувања, а во овој бран се и инвестициите на „Епсотех“ и американскиот „Вебтек“.
Според пратеникот, интерес за вложување покажале и турска и германска компанија од областа на високите технологии со вкупни инвестиции од околу 80 милиони евра и 1.000 нови работни места, а завршени се преговорите со уште три странски компании од автомобилската, фармацевтската и високотехнолошката индустрија.
Во однос на телекомуникацискиот сектор, Велјановски информираше дека компанијата „4iG“, која ја доби дозволата за трет мобилен оператор, планира да инвестира повеќе од 100 милиони евра.
„Овие инвестиции се потврда дека Македонија станува поатрактивна дестинација за долгорочни, стратешки и технолошки напредни инвестиции. Владата предводена од ВМРО-ДПМНЕ ќе продолжи да ги поддржува домашните компании, но и да ги отвораме вратите за странските инвеститори кои сакаат да произведуваат и да создаваат во Македонија“, порача тој.