Ефикасноста на монетарната политика е тесно поврзана со развиеноста на финансиските пазари, поради што континуираните реформи на Народната банка претставуваат основа за зачувување на стабилноста и поттикнување на одржлив развој на финансискиот систем, пишува вицегувернерот Игор Величковски во обраќање во билтенот на Македонската банкарска асоцијација.
Тој се осврнува на активностите на Народната банка во изминатиот период насочени кон зајакнување на преносните механизми на монетарната политика, како и на реформите во платниот систем како клучен дел од финансиската инфраструктура.
Величковски посочува дека измените во оперативната монетарна рамка придонеле за подобро функционирање на меѓубанкарскиот пазар, поголема динамика во управувањето со ликвидноста и приближување на пазарните каматни стапки кон референтната стапка на Народната банка, особено во услови на зголемена неизвесност.
Во однос на платниот систем, тој нагласува дека последните години се спроведени значајни реформи кои ја зголемиле конкуренцијата, ја подобриле заштитата на корисниците и ја засилиле безбедноста на плаќањата. Со усогласувањето со европските стандарди и пристапувањето кон СЕПА, овозможени се побрзи и поевтини плаќања во евра.
Народната банка во моментов работи на воспоставување на нов систем за инстант плаќања базиран на клонот на ТИПС, кој ќе овозможи извршување трансакции во реално време, 24 часа дневно, седум дена во неделата.
Величковски додава дека новата инфраструктура ќе овозможи и развој на иновативни дигитални решенија, побрзо иницирање плаќања преку мобилни апликации и поефикасно користење на средствата од страна на трговците.
Тој потенцира дека постигнатите резултати се резултат на заеднички ангажман на Народната банка, Министерството за финансии, банките и другите институции, при што партнерскиот пристап останува основа за понатамошна модернизација и интеграција во европскиот финансиски систем.