Групата македонски државјани кои беа евакуирани од Израел и патуваа преку Египет, се очекува вечерва околу 20 часот да пристигне на Меѓународниот аеродром Скопје. Според најавите од Министерството за надворешни работи и надворешна трговија (МНРиНТ), на аеродромот патниците ќе бидат пречекани од заменик-министерот Зоран Димитровски.
Покрај оваа група, бројот на македонски граѓани кои побарале помош од подрачјата погодени од конфликтот постојано расте. Досега, до македонските амбасади се обратиле:
- 505 лица во Абу Даби (ОАР);
- 141 лице во Доха (Катар);
- 31 лице во Кувајт;
- 14 лица во Бахреин.
Министерството информира дека веќе е разработен план за нивно враќање:
„Во следните денови се очекува да започне реализацијата на враќањето на македонските државјани од Обединетите Арапски Емирати, како и на граѓаните кои се наоѓаат во Катар, Бахреин и Кувајт, за кои е предвидено враќање со организирани летови преку Кралството Саудиска Арабија.“
Од МНРиНТ упатуваат апел до сите граѓани кои се наоѓаат во загрозените региони, а сè уште не контактирале со нашите претставништва, да го сторат тоа веднаш преку дежурните телефони или СОС-бројот на Министерството.