Општина Валандово ја започна најавената реконструкција на спортската инфраструктура со уредување на трибините на Градскиот стадион. Во тек се градежни работи, а веќе следната недела е предвидено да бидат монтирани 1.500 нови седишта за публиката, кои се донација од Фудбалската федерација на Македонија (ФФМ).
Локалните власти посочуваат дека проектот има за цел да обезбеди соодветни стандарди за спортистите и навивачите.
„Од Општината информираат дека со оваа инвестиција стадионот ќе добие помодерни услови за одигрување натпревари и за следење на спортските настани, а реконструкцијата е само прв чекор од поширокиот план за обнова на спортските терени и игралишта во општината. Покрај уредувањето на Градскиот стадион каде домашните натпревари ги игра ФК „Победа”, општинските власти планираат реконструкција и на останатите спортски терени и игралишта во Општината.“
Градоначалникот на Валандово, Ѓоко Камчев, пред јавноста детално ги образложи следните фази кои вклучуваат интервенции и во околните населени места.
„- Во првата фаза, на градскиот стадион ќе се реконструира она што е најнеопходно, додека во Пирава ќе имаме донација од 2 300 столчиња од ФФМ. Исто така, и реконструкцијата на соблекувалната во Валандово ќе биде обврска на ФФМ, што веќе е договорено. Со истиот план ќе се опфати и игралиштето на Агенцијата за млади и спорт, бидејќи и таму трибините се со изгниени тапи, па ќе поставиме нови столчиња и ќе го дополниме осветлувањето со уште два столба на теренот. Предвидено е да се постави и комплетно осветлување на стадионот „Ѓорѓе Џонов” во Пирава, најави Камчев на седница на општинскиот совет и додаде дека очекува сите активности да се завршат оваа година.“
Според првиот човек на Општината, реконструкциите освен со општински пари и дел со средства од ФФМ, ќе бидат финансирани и од други донатори.
Овие капитални зафати се дел од стратешките документи на локалната самоуправа за тековната сезона. Активностите за реконструкција на сите фудбалски игралишта на подрачје на општината и поставување на дополнително осветлување, како и санацијата на фудбалскиот стадион во градот се дел од Програмата за локален економски развој на општина Валандово за 2026 година.