Пријавувањето за вакцинација против сезонски грип ќе започне штом се отстранат последните технички проблеми со апликацијата, најави денеска министерот за здравство Азир Алиу, при посетата на Клиничката болница во Штип.
Тој се извини до граѓаните поради еднодневното доцнење во однос на претходната најава, посочувајќи дека вакцините веќе се пристигнати, но сè уште се работи на финализирање на апликацијата за пријавување.
„Знаете дека 18 месеци ‘Мој термин’ нема договор за одржување. Се отстрануваат последните технички проблеми и апликацијата ќе биде активна. Се извинувам на граѓаните што доцниме еден ден, но вакцините се пристигнати и пријавувањето ќе започне што е можно поскоро“, изјави министерот.
Во однос на дистрибуцијата на вакцините до центрите за јавно здравје, тој најави дека таа ќе се реализира во наредните денови. Центрите веќе се информирани, а во тек се подготовките за нивно распределување според вообичаениот начин на дистрибуција.