Најмалку две лица загинаа при уривање на седумкатна зграда во турскиот град Гебзе, јавуваат локалните медиуми. Причината за несреќата сè уште не е утврдена, соопшти државната агенција „Анадолија“.
Градоначалникот на Гебзе, Зинур Бујукгоз, изјави дека уривањето можеби е поврзано со градежните активности на блиското метро-градилиште. Гебзе, град со околу половина милион жители, се наоѓа во сеизмички активен регион, каде во катастрофалниот земјотрес во 1999 година со јачина од 7,6 степени загинаа околу 18.000 луѓе.
Експертите со години предупредуваат дека непочитувањето на градежните стандарди претставува сериозен ризик во деловите на Турција каде земјотресите се чести.
Во јануари годинава, слична трагедија се случи во градот Коња, кога по уривање на четирикатна зграда загинаа две лица. Таму, сопствениците на продавниците во приземјето се соочуваат со обвиненија дека ги отстраниле носечките столбови за да го прошират просторот, а им се заканува затворска казна до 22 години.