Општинското кривично државно обвинителство во Загреб поднесе обвинение против докторка од Болничкиот центар „Сестри на милосрдието“, откако на пациентка кон крајот на 2023 година ѝ бил отстранет целиот желудник поради погрешно поставена дијагноза за рак.
Подоцнежните анализи утврдиле дека пациентката имала бениген тумор кој не бара таков оперативен зафат. За време на операцијата во Болничкиот центар во Загреб, покрај желудникот, на пациентката ѝ биле отстранети и лимфните јазли, перитонеумот, слепото црево и жолчното кесе.
Обвинителството ја обвинува докторката за погрешно толкување на резултатите од биопсијата како аденокарцином, иако станувало збор за бениген невроендокрин тумор. Според обвинението, таа не спровела дополнителни тестови што можеле да ја утврдат точната дијагноза, со што се товари за небрежно лекување кое предизвикало особено сериозни телесни повреди. Обвинителството за неа бара затворска казна во траење од една година, објавува „Јутарњи лист“.
Пациентката изјавила дека по операцијата се соочувала со силни болки и дека дури последователната анализа на отстранетиот стомак покажала дека немала рак.
„Имам 80% инвалидитет, а сега имам 100% физичко оштетување“, рекла таа, додавајќи дека и внатрешниот мониторинг на болницата утврдил професионална небрежност во нејзиниот третман.
Обвинетата докторка ја негира одговорноста, тврдејќи дека биле спроведени дополнителни тестови и дека останатите лекари требало да се уверат во завршеноста на дијагностичката обработка пред да започнат со операцијата. Хирургот кој ја извршил процедурата потврдил дека за време на операцијата не можел да го почувствува туморот, но ја продолжил процедурата врз основа на добиените медицински наоди.
Форензичките експерти потврдија дека постои професионална небрежност во дијагнозата и трајни последици за здравјето. Поради отстранувањето на органите, пациентката денес се соочува со постојано гадење, повраќање, губење на тежината и психолошки проблеми, вклучувајќи и ПТСН.