Православните верници денеска, на 8 август, го одбележуваат празникот Света Петка Летна, посветен на преподобната маченица Параскева Римјанка.
Култот кон оваа светителка кај македонскиот народ е исклучително раширен, а во народот таа се смета за заштитничка од разни несреќи и многубројни болести.
Во православниот календар постојат три личности со исто име — Света Параскева (Петка), поради што кај верниците често се мешаат нивните ликови. Првата е Света Петка – Римјанка, втората е Света Петка од Иконија, а третата е Света Петка Епиватска, позната и како Трновска. Најпозната меѓу нив е третата, чиј празник Петковден се одбележува на 27 октомври.
Името Параскева потекнува од значењето „подготовка“, бидејќи сите три светителки биле родени во петок — ден за подготовка пред саботата, која кај Евреите била празник.
Според житието за Света Петка Римјанка, таа била единствена ќерка на римски христијани родена по искрени молитви. По смртта на родителите, таа го раздала имотот на сиромашните, се замонашила и активно го проповедала христијанството во време кога верата била жестоко прогонувана.
Поради вербата била подложена на жестоки измачувања од римските власти, вклучително и фрлање во котел со врело масло и катран, од каде излегла неповредена. По повеќе обиди за нејзино откажување од верата, во II век била погубена по наредба на кнезот Тарасиј, а нејзините мошти подоцна биле пренесени во Цариград.
Со нејзиното име се поврзани голем број чудотворни икони и лековити води, познати како петочни води. Поради почитувањето на светителката, во минатото во одделни краишта, како Мариово, петокот се празнувал дури и повеќе од неделата.