Финалните лабораториски резултати од микробиолошките и физичко-хемиски анализи на водата во Гостивар утре официјално ќе бидат предадени во рацете на Јавното обвинителство за понатамошно постапување. Лабораториите на Институтот за јавно здравје (ИЈЗ) работеа вонредно и во текот на целиот викенд, по барањето на обвинителите кои веднаш ја отворија истрагата за масовното труење.
Раководителот на Одделот за епидемиологија, д-р Драган Кочински, го потврди итниот ангажман на стручните тимови:
„По добивање на барање од страна на Јавното обвинителство, Институтот за јавно здравје веднаш излезе на терен на посочените локации и зема примероци за микробиолошки и физичко-хемиски анализи на водата. По враќањето на екипата во раните утрински часови во петокот, веднаш отпочна постапката за анализа на примероците. Со цел анализата да биде изработена стручно и навремено, стручните лица од Институтот беа на работа и во текот на викендот. Резултатите ќе бидат доставени до Јавното обвинителство за понатамошно постапување во текот на утрешниот ден“, рече Кочински.