Православните верници утре го празнуваат споменот на Светиот апостол и евангелист Марко, сопатник и близок соработник на апостолот Петар. Според календарот на МПЦ-ОА, празникот се одбележува на 8 мај (односно 25 април по стариот стил).
Свети Марко е авторот на едно од четирите Свети Евангелија. Апостол Петар во своите посланија го нарекува свој духовен син, а токму по негово сведоштво и насоки, Марко го запишал животот и чудата на Исус Христос.
Покрај својата евангелистичка дејност, Свети Марко бил поставен за прв епископ во Мисир (Египет), каде што ја проповедал христијанската вера во време кога регионот бил преплавен од незнабоштво. Со Божја помош, тој успеал да ја рашири Христовата наука низ Ливија, Амоникија и Пентапол.
Иако овој ден не се вбројува во редот на „тешки“ празници (црвени букви), во македонската традиција е длабоко почитуван. Утре именден празнуваат сите кои го носат името Марко, но и изведените имиња како Марјан и Марјана.