Успешно заврши големата спасувачка акција во рудникот „Стари Трг“ кај Трепча, каде 18 рудари поминаа повеќе од 12 часа заглавени под земја. Работниците, од кои повеќето се на повозрасна возраст, беа блокирани на длабочина до 770 метри.
Проблемот настанал ноќеска околу 01:30 часот по сериозен дефект во снабдувањето со електрична енергија.
Според информациите на терен, дефектот бил предизвикан од прекин на еден спроводник на далноводот, што повлекло дополнителни оштетувања на опремата во трафостаницата.
Во моментот на прекинот на струјата, во рудникот имало вкупно 47 работници.
„Вкупно 29 рудари успеале веднаш да излезат на површината. Преостанатите 18 рудари останале заглавени бидејќи поради нивната возраст не биле во можност пеш да се искачат на површината без помош на лифтовите“, пренесуваат медиумите.
Санацијата на далноводот траела со часови, по што напојувањето било воспоставено, а лифтовите ги извлекле рударите на безбедно.