Управата за хидрометеоролошки работи (УХМР) издаде повеќе последователни предупредувања за силно невреме што попладнево погоди делови од земјава.
Според информациите од метеоролошката служба, невреме следено со пороен дожд, засилен ветер, грмежи и можност за суградица првично го зафати Македонски Брод, по што нестабилноста се прошири во југоисточен правец.
Кратко потоа, интензивни врнежи од дожд, град и силен ветер беа регистрирани во регионот југоисточно од Македонски Брод.
Од УХМР информираат дека облачната маса продолжува да се движи во правец од северозапад кон југоисток, при што силно невреме со град, грмежи и засилен ветер е забележано и во подрачјето југоисточно од Крушево.