Полицијата го идентификуваше и пронајде возачот кој на 16 март со автомобил удри 11-годишно девојче на улицата „Васил Ѓоргов“ во Скопје, по што го напушти местото на несреќата. Станува збор за С.Б. од Скопје, информираат од Министерството за внатрешни работи.
Според МВР, случајот бил пријавен во 16:10 часот од Ургентниот центар при комплексот клиники „Мајка Тереза“, каде што било донесено девојчето со тешки телесни повреди. Првичните информации укажуваат дека сообраќајната незгода се случила околу 13:20 часот на крстосницата меѓу улицата „Васил Ѓоргов“, сервисната улица и „Народен Фронт“, кога патничко возило ја удрило малолетничката и веднаш потоа избегало.
По преземени оперативни мерки и активности, полицијата успеала да го лоцира и идентификува сторителот.
Против возачот, СВР Скопје ќе поднесе кривична пријава по член 300 од Кривичниот законик – за тешки дела против безбедноста на луѓето и имотот во сообраќајот, како и по член 301 – за неукажување помош на лице повредено во сообраќајна незгода.
Надлежните апелираат до сите учесници во сообраќајот на поголема внимателност и одговорност, особено кога станува збор за безбедноста на пешаците и децата.