Колумбиската полиција води интензивна истрага по убиството на 21-годишната Марија Камила Потоси, која била во осмиот месец од бременоста. Нејзиното тело било пронајдено со повеќекратни убодни рани, а според полициските информации, напаѓачите го извадиле фетусот од нејзиниот стомак. Потрагата по новороденчето е во тек.
Потоси исчезнала на 16 јули откако го напуштила својот дом во Кали за да отиде на пренатален преглед, само неколку дена откако дознала дека носи девојче.
Според снимките од безбедносните камери, таа последен пат е видена на мотоцикл управуван од жена која ја запознала два месеци претходно преку програма за поддршка на бремени жени. Жената веќе дала изјава пред истражителите.
Мајката на убиената девојка, Алба Гомез, упати јавен апел за пронаоѓање на нејзината внука.
„Сè што барам со овој апел, со верување дека моето бебе е живо, е да се пронајде. Ги молам луѓето што ја имаат да ја послушаат својата совест и да ми ја вратат“, изјави таа за новинарите.
Случајот предизвика остри реакции во колумбиската јавност и кај политичките претставници.
Сенаторката Џенифер Педраза побара итна разврска и одговорност за случајот.
„21-годишна бремена жена беше киднапирана, мачена и убиена. Ништо не се случува во оваа земја. Бараме правда“, рече таа.
Реагираше и поранешната претседателска кандидатка Сондра МекКолинс, упатувајќи критики до институциите.
„Ова ја покажува целосната некомпетентност на системот. Очекуваме Канцеларијата на државниот обвинител и полицијата да дадат јасни и решителни одговори“, рече МекКолинс.
Полициската истрага и операцијата за пронаоѓање на бебето продолжуваат.