Државјанин на Северна Македонија, кој управувајќи со камион удрил во возач на санитетско возило на стопирачката лента кај Грделица, денеска е пронајден и лишен од слобода.
Според информациите од Полициската управа во Лесковац, на македонскиот државјанин му е одреден притвор во траење од 48 часа.
Тешката сообраќајна несреќа се случила во вторникот попладне во близина на Грделица. Санитетското возило, кое превезувало десетгодишно дете од Врање кон болницата во Ниш, претрпело дефект и морало да запре на патот.
Возачот на санитетот излегол од возилото за да го провери и отстрани дефектот. Во тој момент, според досегашните информации, наишол камионот управуван од македонскиот државјанин и директно удрил во вратата од санитетското возило. Од силината на ударот, вратата го отфрлила возачот.
Тој со главата удрил во бетонската подлога и се здобил со тешки телесни повреди. Повредениот итно бил пренесен и згрижен во Универзитетскиот клинички центар во Ниш.
Во меѓувреме, десетгодишното дете, за кое постоело сомнение дека има воспаление на слепото црево, било успешно транспортирано до Ниш благодарение на случајна средба со лекарка.
Докторката, која со својот приватен автомобил наишла на местото на несреќата, веднаш го презела детето и го одвела во болница.