Американскиот претседател Доналд Трамп, за време на заедничката прес-конференција со германскиот канцелар Фридрих Мерц во Овалната соба, испрати клучни пораки во врска со воената операција во Иран и нејзиното влијание врз глобалниот пазар на енергенси.
Нафтениот пазар по конфликтот
Иако тековните напади на САД и Израел предизвикаа потрес на берзите, Трамп уверува дека ова е само привремена состојба. Тој предвидува дека по завршувањето на воените дејствија, цената на нафтата драстично ќе се намали.
„Значи, ако имаме малку повисока цена на нафтата некое време, штом ова ќе заврши, тие цени ќе се намалат. Верувам дека ќе бидат пониски дури и од порано“, истакна Трамп.
Кој ќе го води Иран?
Едно од најинтригантните прашања беше за евентуалниот наследник на власта во Техеран. Иако Реза Пахлави, синот на последниот ирански шах кој живее во САД, често се споменува како опција, Трамп изрази сомнеж за таквото решение. Претседателот смета дека новиот лидер треба да дојде од самата земја.
„Пахлави изгледа како фин човек, но иако некои луѓе го сакаат, верувам дека најдоброто можно сценарио би било некој што веќе е таму да ја преземе власта“, изјави тој, посочувајќи дека кандидатот кој живее во Иран би бил посоодветен.
Поддршка од дијаспората и предупредување до граѓаните
Претседателот Трамп се осврна и на реакциите на иранската заедница во САД, тврдејќи дека тие ја поддржуваат воената акција против тековниот режим. Како доказ ги посочи собирите во Калифорнија.
„Толку многу луѓе рекоа благодарам, благодарам, благодарам. Го гледате тоа на улиците на Лос Анџелес. Факт е дека луѓето се задоволни од она што го направивме“, рече Трамп.
Сепак, тој упати и сериозно предупредување до граѓаните во Иран кои се наоѓаат во зоните на дејствување, апелирајќи на нивна безбедност: „Ги предупредувам Иранците да не излегуваат на улиците додека трае бомбардирањето“.
Операцијата на САД против Иран, која започна минатата сабота, продолжува да предизвикува бројни реакции во меѓународната јавност.