Американскиот претседател Доналд Трамп тајно го напуштил минатомесечниот самит на НАТО во Анкара користејќи алтернативен воен авион и возило за кетеринг, додека Белата куќа креирала илузија за новинарите дека тој патува со претседателскиот „Ер Форс Уан“, објави весникот „Вашингтон пост“.
Главна причина за оваа вонредна оперативна маневра била сериозна и конкретна закана за атентат врз американскиот претседател од страна на Иран.
Според документите и изворите запознаени со патувањето, безбедносните служби организирале софистицирано префрлање на Трамп директно на пистата во Анкара.
Трамп првично се качил во постариот модел на „Ер Форс Уан“ пред телевизиските камери, за да остави впечаток дека полетува кон воената база Милденхол во Велика Британија.
Само неколку минути подоцна, Трамп и неколку негови блиски соработници скришум излегле од авионот од спротивната страна преку хидраулична платформа на аеродромско возило за достава на храна. Со возилото биле пренесени до помал воен авион од типот „Ер Форс Ц-32А“ со кој Трамп заминал за Велика Британија.
На мала група новинари кои патувале со претседателскиот авион им било наредено да ги спуштат ролетните на сите прозорци за да не забележат дека Трамп воопшто не е во леталото.
По пристигнувањето во базата Милденхол, Трамп повторно неопазено се качил во светлосиниот „Ер Форс Уан“ пред очите на фотографите, по што ја продолжил рутата кон Вашингтон со новиот претседателски авион.
Реагирајќи на извештаите, Белата куќа не ги демантираше наводите за користењето алтернативни авиони и тајни процедури.
„Како што претседателот неодамна кажа, постојат бројни непријатели на Америка кои го држат на нишан и ние ги користиме сите расположливи средства за да се справиме со тие закани“, изјави директорот за комуникации на Белата куќа, Стивен Чунг.
Запрашан директно од новинарите во авионот дали постоела директна закана за напад врз „Ер Форс Уан“, Доналд Трамп изјави: „Јас сум под закана цело време. Јас сум број еден на нивната листа, пред сите вас. Но, ако јас настрадам, и вие ќе настрадате.“