Американскиот претседател Доналд Трамп упати директно предупредување до Техеран, нагласувајќи дека иранските сили ќе бидат „збришани од лицето на земјата“ доколку се обидат да ги таргетираат американските бродови во Ормутскиот Теснец. Оваа закана доаѓа во рамки на операцијата „Слобода“, која обезбедува придружба на пловила низ овој стратешки важен премин.
Трамп информираше дека американските сили веќе уништиле „седум мали ирански чамци“, по нападите врз повеќе пловила во теснецот. Паралелно со тензиите, Германија го пренасочи својот логистички брод „Мозел“ (A512) од Егејското кон Средоземното Море, како подготовка за можно вклучување во мисијата во Ормуз.
Во меѓувреме, ситуацијата на Блискиот Исток останува критична и во Либан. Лидерот на Хезболах, Наим Касем, изјави дека „во Либан нема прекин на огнот, туку е во тек израелско-американска агресија“.
Според либанското Министерство за здравство, билансот на жртви од почетокот на израелските напади на 2 март достигна најмалку 2.696 загинати, додека бројот на повредени е 8.264 лица.