Индиректни разговори за можен Договор за мировниот план на Соединетите Американски Држави за ставање крај на војната во Газа продолжуваат денеска во египетскиот град Шарм Ел Шеик.
Сесиите се фокусирани на создавање теренски услови што би овозможиле ослободување на сите израелски заложници во замена за голем број палестински затвореници од Израел, изјавиле палестински и египетски претставници за Би-Би-Си.
Израелскиот премиер Бенјамин Нетанјаху во саботата изјави дека се надева оти ќе го објави ослободувањето на заложниците во наредните денови.
Американскиот претседател Доналд Трамп, пак, вчера кажа дека постојат добри шанси за постигнување договор, кој, како што рече, би бил траен.
„Имаме навистина добри шанси да постигнеме договор и тоа ќе биде траен договор“, рече Трамп.
ХАМАС од друга страна соопшти дека делумно се согласува со предлозите кои се содржани во мировниот план на САД. Сепак, не одговори на неколку клучни барања како што се разоружување на организацијата и нејзино исклучување од натамошното управување со Газа. Вториот ден од разговорите во Шарм Ел Шеик, на кој египетските и катарските претставници ќе одржат одделни средби со делегации на Израел и Хамас, ќе се одржи на втората годишнина од нападот што го изврши Хамас врз јужен Израел на 7 октомври 2023 година, во кој беа убиени околу 1 200 луѓе, а 251 други беа земени како заложници.
Нападот беше повод израелските сили да започнат воена кампања во Газа, во која, според Министерствот за здравство во Појасот, кое е под контрола на Хамас, досега се убиени 67 160 лица, меѓу кои 18 0000 се деца.