Администрацијата на американскиот претседател Доналд Трамп подготвува мерка за укинување на туристичките и деловните визи за околу 200 илјади странски државјани кои во меѓувреме поднеле барање за азил во САД.
Доколку биде спроведена, оваа одлука би претставувала најголемо еднократно масовно укинување на визи во историјата на Соединетите Американски Држави.
Според документи на Стејт департментот до кои дошле медиумите, во следните неколку недели се очекува официјално да биде објавено укинувањето на таканаречените Б1 и Б2 визи. Станува збор за визи издадени во периодот од 2016 до 2026 година на лица кои откако пристигнале во земјата побарале азил.
Процесот ќе се спроведува во директна координација со Министерството за внатрешна безбедност на САД.
„Координираме со Министерството за внатрешна безбедност за да ги идентификуваме и укинеме визите на странски државјани кои пристигнале во САД претставувајќи се како краткорочни посетители, но потоа поднеле барање за азил за да останат трајно во земјата“, изјави портпаролот на Стејт департментот Томи Пигот.
Правните експерти укажуваат дека мерката би можела да се соочи со правни предизвици и да биде оспорена пред американските судови.
Откако Доналд Трамп го презеде вториот претседателски мандат, неговата администрација континуирано ги затегнува критериумите за американските визи. Меѓу новите правила беа воведени барања за дополнителни информации за активностите на социјалните мрежи, високи такси за обработка, како и целосна забрана за издавање визи за државјани на одделни земји.