Соединетите Американски Држави и Канада се блиску до прелиминарен договор за ублажување на американските царини за канадски челик и автомобили, што би можело да стави крај на повеќемесечниот трговски спор меѓу двете соседни земји. Според повеќе извори од двете страни, владите се обидуваат да ги поправат односите нарушени по прекинот на разговорите во август, објавува „Ројтерс“.
Преговорите се фокусирани на царините што Вашингтон ги воведе повикувајќи се на Член 232 од американскиот трговски закон. Мерките вклучуваат давачки од 50 проценти за канадскиот челик и 25 проценти за автомобилите, а преговарачите во моментов ја разгледуваат можноста за нивно елиминирање.
Разговорите се интензивираат во период кога на американската Републиканска партија ѝ претстојат клучни избори, каде што царините за канадскиот увоз станаа сериозен политички товар. Републиканските кандидати од пограничните сојузни држави сè погласно бараат прекин на трговскиот спор.
Извори од канадската индустрија наведуваат дека доколку се постигне договор пред изборите на 3 ноември, тој најверојатно ќе биде со ограничен опсег. Од друга страна, американските преговарачи предводени од секретарот за трговија Хауард Латник бараат дополнителни отстапки од Отава.
Латник во изминатиот период одржува редовни контакти со канадскиот министер задолжен за трговски односи со САД, Доминик Лебланк.
Канада продолжува конструктивно да се ангажира со своите американски колеги за низа приоритети, изјави портпаролот на министерот Лебланк.
Подготвени сме конструктивно да се ангажираме со добра волја за да воспоставиме трговски однос што е покорисен за двете страни и ги почитува интересите на Канада, додаде тој.
Канадски извор од индустријата истакнува дека можниот договор нема да биде сеопфатен.
Ако се постигне договор, ќе се постигне брзо. Сепак, мојот впечаток е дека договорот, ако воопшто постои, ќе биде доста ограничен по обем, рече тој.
Друг извор додава дека крајниот исход ќе зависи од директниот разговор меѓу претседателот Доналд Трамп и канадскиот премиер Марк Карни.
Првичните трговски разговори пропаднаа во август поради несогласувања околу намалувањето на царините за товарни возила. Во меѓувреме, Трамп во петокот потпиша наредба со која се укинаа царините од 50 проценти за одредени канадски земјоделски и шумски производи, а на митинг најави дека трговскиот спор ќе биде решен „наскоро“.