Дваесет и шестгодишната Фатен Бен Омар Ел Азизи, поранешна фудбалерка на Атлетико Тетуан, се удави при обид да преплива од Мароко во шпанската енклава Сеута. Трагедијата се случила истиот ден кога од шпанскиот конзулат ѝ било соопштено на нејзината мајка дека на девојката ѝ е одобрена виза за Шпанија, објавува „Гардијан“.
Фатен се удавила на 30 јули како една од речиси 150-те жртви на масовниот обид за преминување на границата. Според организацијата „Каминандо Фронтерас“, во овој бран загинале најмалку 141 лице, главно помлади од 35 години.
Иако играла во женската регионална лига за Атлетико Тетуан, фудбалот не ѝ овозможувал егзистенција. За победа добивала околу 25 евра, а за пораз ништо, па дополнително работела на локалните гробишта во Тетуан каде чистела гробови и продавала босилек за да го издржува семејството по смртта на нејзиниот татко.
„Таа сонуваше да стигне до Европа преку фудбал“, вели нејзината мајка, Џамила. На крајот, Фатен била погребана токму на гробиштата каде што работела.
Истиот ден кога исчезнала, нејзината мајка добила телефонски повик од дипломатското претставништво. Му соопштиле дека на нејзината ќерка ѝ е издадена виза и треба да ја подигне од конзулатот во Тангер. Мајката не знаела дека Фатен воопшто аплицирала за виза, ниту зошто решила да го ризикува животот по морски пат.
Телото го идентификувала нејзината tetка, откако еден очевидец им соопштил дека Фатен си ја удрила главата за време на препливањето. По трагедијата, мајката открила дека и нејзините други две деца заминале кон Сеута – постариот син успеал да премине, додека за 14-годишната ќерка сè уште чека потврда.
„Сега сум оставена сама, без деца“, заклучува таа.
Оваа трагедија доаѓа во период на растечко незадоволство меѓу младите во Мароко, каде што невработеноста кај младите до 24 години достигнува речиси 40 проценти, а минималната плата во приватниот сектор изнесува околу 300 евра. Граѓаните сè почесто ја критикуваат власта дека вложува во скапи стадиони за Светското првенство во 2030 година наместо во здравството и отворањето нови работни места.