Страшна трагедија ја потресе Бања Лука откако претпладнево избувна пожар во семејна куќа, при што едно шестгодишно дете го загуби животот, а уште едно малечко е тешко повредено.
Полициската управа во градот била алармирана за огнената стихија во 10:30 часот, по што на улицата „Караѓорѓева“ во населбата Лауш веднаш се упатиле полициски тимови, пожарникари и амбулантни возила.
Припадниците на Противпожарната и спасувачка бригада брзо интервенирале на теренот за да го запрат ширењето на огнот, но за едното дете веќе било предоцна.
„Членовите на Противпожарната и спасувачка бригада на Бања Лука го локализираа пожарот, по што беше утврдено дека едно дете починало во пожарот, а едно дете се здобило со тешки повреди и е на лекарска помош во Универзитетскиот клинички центар на Република Српска“, соопшти полицијата.
За тешкиот инцидент веднаш бил известен и дежурниот јавен обвинител од Окружното јавно обвинителство во Бања Лука, кој излегол на местото на настанот за да раководи со увдот кој треба да ги открие причините за пожарот.