Дебарската територијалната противпожарната единица, покрај вообичаените интервенции, реализираат активности во основните и средните училишта, чија цел е учениците да се запознаат со начинот како да реагираат во случај на пожар.
Во тие рамки во Средното општинско училиште „28 Ноември“ во Дебар, 14-те пожарникари предводени од командирот Џетан Мифтароски, одржаа симулациска вежба на гаснење пожар при што дадоа практични совети на учениците за тоа како да се заштитат и да се справат во ситуации при појава на пожар.
Директорот на училиштето, Аргетим Трепча, рече дека активноста била неопходна и многу значајна, а истата оценка ја даде и градоначалникот Фисник Меља, кој ја следеше оваа активност.
-Најпрво сакам да искажам висока оценка за ефикасноста на пожарникарите, за нивниот професионализам и посветеноста покрај многуте обврски да ги едуцираат младите во едукацијата на младите за безбедност и правилна реакција во итни ситуации. Општина Дебар останува посветена на поддршката на активности кои ја зголемуваат јавната безбедност и едукацијата на младите генерации, рече Меља.
Дебарската единица, поточно нејзините 14 пожарникари освен во Општина Дебар, интервенираат и во Општина Центар Жупа и подрачјето на Река, Општина Маврово и Ростуше, каде исто така реализираат превентивни и едукативни активности во тамошните училишта.