Министерот за внатрешни работи, Панче Тошковски, појасни дека толеранцијата на камерите од системот „Безбеден град“ ќе биде идентична со онаа што веќе се применува кај стандардните полициски радари. Тој нагласи дека овие олеснувања важат само за сообраќајни прекршоци, но не и за кривични дела сторени во сообраќајот.
Според министерот, за брзини до 100 километри на час ќе се толерира надминување од 6 километри, додека за брзини над 100 километри на час толеранцијата е 8 километри. Доколку возите со брзина над 200 километри на час, системот ќе има отстапка од 12 километри.
„Доколку дозволената брзина е 50 километри на час, системот ќе регистрира прекршок при 57 километри на час“, појасни Тошковски при гостувањето на телевизија „Телма“.
Дополнително, министерот информираше дека под лупа ќе бидат и службените возила. Иако итната помош, пожарникарите и полицијата нема да се евидентираат при итни интервенции, тие ќе бидат казнети доколку системот ги сними во прекршок кога немаат оправдана оперативна потреба.