Министерот за внатрешни работи, Панче Тошковски, денеска ги посети полициските службеници кои посетуваат обука во рамки на проектот „Превенција и заштита од родово базирано насилство – Фаза 3”. Проектот се спроведува од Центарот за обука на МВР и УНФПА, со поддршка од Британската амбасада во Скопје.
Оваа обука е дел од осумте предвидени циклуси на тема „Почетна едукација на професионалците за родово базирано насилство врз жените и семејното насилство и мулти-секторски одговор”. План е низ неа да поминат вкупно 200 полициски службеници од сите осум Сектори за внатрешни работи, вклучувајќи водичи на безбедносен реон, сменоводители и инспектори.
Според министерот, фокусот е ставен на подигнување на нивото на професионалност при справување со овие случаи на терен.
„Обуките се насочени кон јакнење на компетентноста на нашите службеници, со јасна порака дека жртвата мора да биде во центарот на секоја интервенција. Секој полициски службеник кој излегува на терен мора да знае како да обезбеди помош, поддршка и заштита за жртвите на родово базирано и семејно насилство“, истакна Тошковски.
Тој потенцираше дека ваквиот тип на едукација претставува директна инвестиција во луѓето, во системот и во крајната заштита на граѓаните.
„Ова е инвестиција во луѓе, во систем и во заштита на нашите граѓани. Благодарност до УНФПА и до Британската амбасада во Скопје за постојаната поддршка во градењето на подобар полициски одговор“, порача министерот за внатрешни работи.