Министерот за внатрешни работи, Панче Тошковски, најави клучни законски измени во борбата против семејното насилство, со кои полициските службеници ќе добијат ново, суштинско овластување. Според предлогот, полицијата ќе може веднаш, на самото место, да изрече итна мерка за заштита која вклучува отстранување на сторителот од домот, забрана за приближување и забрана за контакт со жртвата.
На денешната надзорна расправа пред собраниската Комисија за еднакви можности на жените и мажите, Тошковски истакна дека семејното насилство е прашање преку кое најјасно се гледа дали функционира системот, критикувајќи го досегашниот фрагментиран пристап со задоцнети реакции.
„Полицискиот службеник ќе може веднаш да изрече итна мерка за заштита на жртвата. Мерката ќе се изрекува веднаш, без согласност од жртвата, и ќе важи до 48 часа, по што Судот ќе ја потврди, укине или ќе ја продолжи до 30 дена“, појасни Тошковски.
Ваквото постапување, кое предвидува заштита врз основа на полициска проценка на ризик и непосредна опасност, е целосно усогласено со Истанбулската конвенција.
Дополнително, министерот најави дека паралелно со овие законски измени, МВР активно работи на воведување на т.н. „боди-камери“ (камери на тело) за полициските службеници. Целта на оваа технолошка новина е прецизно да се документираат интервенциите при пријави за семејно насилство, со што драстично ќе се намали можноста за манипулации и различни толкувања на настаните во подоцнежните судски постапки.