Институтот за јавно здравје (ИЈЗ) објави серија препораки за заштита на здравјето на граѓаните поради најавите од Управата за хидрометеоролошки работи (УХМР) за екстремно високи температури кои ќе ја зафатат земјата од утре, 1 август, па сè до 7 август.
Според УХМР, под влијание на топла воздушна маса од југ, во деновите од продолжениот викенд и во текот на следната седмица времето ќе биде многу топло, со дневни температури кои насекаде ќе надминуваат 32 степени, а во одделни места ќе достигнат и над 40 степени. Високи температури ќе се бележат и во ноќните часови.
Од ИЈЗ апелираат граѓаните да избегнуваат директно изложување на сонце и активности на отворено во периодот од 11 до 17 часот. Се препорачува носење светла и лесна облека, заштитни очила и капа, како и престој во климатизирани простории. При задолжителен престој на отворено, потребно е да се прават чести одмори во сенка.
Во однос на исхраната и хидратацијата, советниците од ИЈЗ укажуваат да се внесува доволно вода и минерални безалкохолни пијалаци без да се чека чувство на жед, а да се избегнуваат масна храна, шеќери, алкохол, кофеински и премногу студени пијалаци.
Посебна дисциплина и редовно земање на терапијата се бара од ранливите категории – лицата над 60 години, бремените жени, децата, социјално ранливите, работниците на отворено и хронично болните лица. За какви било промени во состојбата, тие веднаш треба да се консултираат со матичен лекар.
За разладување на домовите се препорачува затворање на прозорците и ролетните преку ден и нивно отворање навечер. Од ИЈЗ посебно предупредуваат да не се оставаат лица во паркирани возила, а за разладување на телото да се користат млаки тушеви и ладни облоги.
При појава на симптоми како зашеметеност, слабост или интензивна главоболка, потребно е веднаш да се премине во ладна просторија и да се консумираат течности со електролити. Доколку топлотните грчеви во мускулите траат подолго од еден час, неопходно е да се побара лекарска помош.
Од Институтот предупредуваат дека доколку некое лице има сува кожа, грчеви или е во бессознание, веднаш треба да се повика Итна медицинска помош на 194 или 112. Додека се чека екипата, лицето треба да се постави во хоризонтална положба со подигнати нозе над 20 сантиметри, да се расоблече и постојано да се разладува со вода, без да му се дава терапија