Соединетите Американски Држави соопштија дека ќе издвојат две милијарди долари за Обединетите нации за хуманитарна помош, во време кога ООН се соочува со сериозен недостиг на финансиски средства.
Иако САД годинава ја намалија странската помош, тие остануваат еден од најголемите донатори. Во исто време, водечките западни донатори на ООН, вклучувајќи ја и Германија, исто така ги намалија своите придонеси со цел пренасочување на средствата кон одбраната. Ова доведе до значителен финансиски јаз во хуманитарните програми на ООН.
Директорот на Канцеларијата на ООН за координација со хуманитарните работи (ОЦХА), Том Флечер, изјави дека хуманитарните операции се преоптоварени и недоволно финансирани. „Тоа значи дека сме принудени да носиме брутални одлуки и да им даваме приоритет на оние на кои помошта им е најпотребна“, нагласи Флечер.