Бројот на жртвите од тајфунот Фунон на Филипините се искачи на 25 лица, соопшти Националната служба за цивилна заштита. Дополнително, 29 лица се повредени, а двајца се водат како исчезнати.
Најголем број на жртви – 19 лица, се регистрирани во административниот регион Кордилера, тројца во Кагајан, додека по еден загинат е пријавен во Бикол, Западен Висајас и Источен Висајас.
Според властите, супер тајфунот Фунон погодил повеќе од 2,4 милиони луѓе, предизвикувајќи сериозни оштетувања на домови, патишта и електрични мрежи.
Претседателот на Филипините, Фердинанд Маркос помладиот, издаде наредба за континуирани спасувачки операции и побара сите владини агенции да останат во целосна готовност за справување со последиците од бурата.
„Сите ресурси се мобилизирани. Наш приоритет е спасување на животите и поддршка на погодените заедници,“ изјави Маркос.