Во Амбасадата на Соединетите Американски Држави во Скопје вечерва се одржа традиционалниот свечен прием по повод одбележувањето на големиот јубилеј, 250-годишнината од американската независност.
Настанот, кој традиционално се организира неколку дена пред самиот официјален празник 4 јули, собра голем број гости, меѓу кои дипломати, претставници на политички партии, градоначалници, како и јавни личности и новинари.
Вршителката на должноста амбасадорка на САД, Никол Варнс, во своето обраќање пред присутните истакна дека ова не е само обична прослава на историјата, туку пред сè на можностите. Нагласи дека иднината им припаѓа на општествата кои поттикнуваат иновации, инвестираат во талентот и имаат доверба во своите граѓани.
Свечената прослава, заокружена со традиционален огномет, беше искористена и како потврда за децениското стратешко партнерство и пријателство меѓу двете држави во клучните демократски процеси.