Седат Сулејмани е избран за нов министер за култура и туризам на 112. седница на Собранието, на која се разгледуваше реконструкцијата на Владата.
Сулејмани, кој доаѓа од редовите на коалицијата ВРЕДИ, ја презема функцијата од досегашниот министер Зоран Љутков, кој претходно беше разрешен.
Новиот министер за култура и туризам во периодот од 2024 до 2026 година ја извршувал функцијата заменик-министер за култура и туризам, а истата позиција ја имал и во периодот од 2020 до 2021 година.
Во 2023 година бил советник за стручна и административна поддршка во Општинскиот инспекторат на Општина Тетово. Претходно, од 2017 до 2019 година работел како менаџер во компанијата ISEM во Бурса, Турција.
Во периодот од 2012 до 2017 година бил сопственик на „LOST Treasure“ во Тетово, а од 2010 до 2012 година сопственик на „ШАР Продукција“. Од 2006 до 2010 година бил директор на „АРДИ-ИНГ“ – Тетово, додека од 2003 до 2006 година работел како администратор во „SHARR-ING“ – Тетово.
Сулејмани има диплома по социолошки науки и педагошка теологија од Универзитетот „Улудаг“ во Бурса, Турција.