Основниот суд во Улцињ ѝ одреди 30-дневен притвор на 46-годишната македонска државјанка С.С., која е осомничена за кривично дело убивање и мачење животни, како и уништување на нивното живеалиште.
Според полициски извори од Црна Гора, инцидентот се случил на 24 јули, кога жената со автомобил „Мерцедес“ наводно намерно прегазила куче од расата шарпланинец.
По настанот таа се обидела да ја напушти земјата, но била запрена и лишена од слобода на граничниот премин Сукобин – Муриќани.
Одбраната изнесува поинаква верзија за настанот, посочувајќи дека шарпланинецот претходно го усмртил нивното мало куче од расата шицу и ги нападнал осомничената и нејзиниот малолетен брат.
Според адвокатот, возилото било употребено со цел да се оттурне животното, а не со намера тоа да биде усмртено.
Ќерката на осомничената во изјава за Сител исто така посочи дека станува збор за опасно куче кое се обидело да ги нападне во нивниот апартман.
Случајот предизвика бројни реакции и поделени мислења во јавноста и на социјалните мрежи.
Официјалните околности и сите докази, вклучително снимки и сведочења, дополнително ќе ги утврдува црногорското обвинителство во текот на истрагата.