Судот го прифати барањето на Јавното обвинителство и донесе одлука за одредување на 30-дневен притвор за поранешниот претседател на Фудбалската федерација на Македонија (ФФМ), Илчо Ѓорѓиоски.
Покрај него, мерката притвор во траење од 30 дена ѝ е одредена и на Олгица Младеновска, која ја извршуваше функцијата раководителка на Секторот за финансии во ФФМ за време на мандатот на Ѓорѓиоски.
Претходно, во рамките на отворената истражна постапка која се води против вкупно 18 физички и осум правни лица за проневера на над 180 милиони денари, Обвинителството побара притвор за осуммина, како и мерки за претпазливост за четири лица.
Официјалните информации покажуваат дека Ѓорѓиоски бил лишен од слобода поради констатирани неправилности во работењето за периодот од 2015 до 2019 година, поврзани со финансиски криминал тежок речиси три милиони евра.
Големата полициска акција е резултат на повеќегодишна предистражна постапка за работењето на ФФМ.
Претресите беа извршени под раководство на јавен обвинител од Основното јавно обвинителство за гонење организиран криминал и корупција, во координација со Управата за финансиска полиција и МВР, при што беа проверени домови и деловни простории на повеќе локации во Скопје.
За време на акцијата од слобода беа лишени 12 лица, меѓу кои и Илчо Ѓорѓиоски, додека пет лица во моментов се сè уште недостапни за органите на прогон.
Ова е втор поранешен претседател на ФФМ кој завршува во притвор за краток период, откако во април годинава беше уапсен и Муамед Сејдини, поради основано сомневање за проневера на парични средства поврзани со изградбата на трибина на стадионот „Билјанини Извори“ во Охрид.