Со презентирање на материјални докази од Обвинителството кои се однесуваат на Државниот пазарен инспекторат (ДПИ), денеска во судницата во КПУ „Идризово“ продолжува судењето за пожарот во кочанската дискотека „Пулс“, во кој загинаа 63 лица, а над 200 беа повредени.
Судењето е во фаза на доказна постапка, а на претходното рочиште Обвинителството презентираше докази обезбедени од Министерството за економија и труд, сектор за туризам и угостителство, кои се однесуваат на лиценцирањето на дискотеката.
Со изведување на докази започна обвинителката Наташа Сарамандова, за кои рече дека се однесуваат на околности поврзани со почетокот на работењето на објектот, иако не биле исполнети минималните технички услови. Постапката продолжи со друг обвинител, откако одбраната поднесе барање за изземање на Сарамандова поради наводна пристрасност при презентацијата на доказите.
Во знак на револт, родителите на загинатите во пожарот во дискотеката „Пулс“ во Кочани доброволно ја напуштија судницата во КПУ „Идризово“.
Во пожарот на 16 март 2025 година, за време на настап на групата ДНК, загинаа 63 лица, а над 200 беа повредени. Судењето го води судијката Дијана Груевска-Илиевска, а обвинението го застапува тим од 15 јавни обвинители.