Судењето против 13 полициски службеници обвинети за тешки дела против општата сигурност, поврзани со трагичниот пожар во кочанската дискотека „Пулс“, започна одново поради промена во составот на Судечкиот совет.
Од Судот информираат дека еден од поротниците известил оти поради здравствени причини повеќе од еден месец нема да може да присуствува на судењата. Вториот поротник, пак, посочил дека поради други ангажмани повеќе нема да учествува во судските процеси.
Судењето го води судијката Фанка Јанчулева Михаиловска, додека обвинението го застапува јавната обвинителка Спасенка Андонова.
Обвинителството останува целосно на обвинението, потврди Андонова.
Обвинетите Дејан Салтировски, Ванчо Георгиевски, Марија Маневска, Томе Донев, Драган Петрушев, Кире Богатинов, Стојанче Филипов, Благица Митева, Кристина Николова, Мазлум Рамаданов, Дарко Милошевски, Мартин Арсовски и Маријан Радевски повторно се произнесоа пред Судот во однос на обвинението. Сите изјавија дека остануваат на претходно дадените искази и не признаваат вина.
Од Судот информираат дека досега изведените материјални докази и сослушаните сведоци се преземаат во новата постапка, по што продолжува изведувањето на доказите со сослушување на сведоци предложени од Обвинителството.
Случајот се однесува на трагичниот пожар што избувна на 16 март во дискотеката „Пулс“ во Кочани, во кој животот го загубија 63 лица, а повеќе од 200 беа повредени.
Според обвинението, полициските службеници кои биле на должност во критичниот период истовремено биле ангажирани и во дискотеката, но не ја прекинале забавата и не спречиле употреба на пиротехнички средства.